Page - 386 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

386 I. Österreich: Hofspitäler (Edition Nr. 1–16) volmächtigen gwalt unnd bevelch haben, irem guetbedunkhen nach mit unnserm vorwißen einen spitlmaister, item zwen caplan, einen leibarzt, einen wundtarzt, einen siechmaister, siechmaisterin unnd zuchtmaisterin, so guets leimbds, erbar, verstänndig unnd gotsforchtig personnen sein, in unnser spittal, auch von ir yedem den gebüerlichen aid, des spitals unnd der armen nuz unnd frumen zubetrachten, zuhanndlen, nachtail unnd schaden iren höchsten verstanndt nach zewarnen unnd zuwennden, unnd iren diennster alles müglichen vleiß treulich außwartten etc. aufnemen, auf sy den einkhauffer, zueschroter, khoch, kelner, kasstner, mair, weingartkhnecht unnd all annder des spittals unnd der armen leüt officier, dienner unnd diennerin einen ordenlichen stat aufzurichten, inen nach gelegenhait yeder person, diensts unnd vleiß besoldung zugeben unnd, wo von nötten, gedachte personnen zustraffen, gar zu urlauben unnd annder widerumb aufzunemen etc. [2.] Die superintendenten sollen dem spittal nichts entziehen laßen, über alles des spittals einkhumen, wie das immer namen haben mag, ein ordenlich urbar aufrichten, daßelb sambt des spittals annder brieflichen urkhunden unnd freyheitten im spittal in verwarung mit zwayen underschidlichen verkherten schlüeßln, deren jeder superintendent einen haben solle, behalten etc. [3.] Ainem spitlmaister ain schreiber, personnen unnd roß, sovil er zu verrichtung seines ambts nit enndtperen khann, halten, item die parschafft, traid, wein, petgewanndt, khlaider, leinen unnd wullen tuech, haußrath unnd alle varnuß, außer unnd inner spitals, mit einem ordenlichen inventaryo in sein verwarung unnd veranntwortung zuestellen, von ime, so es notdurfft erfordert, unnd auf wenigist jede Quottember einen lauttern außzug alles emphanngs, außgebens unnd der varnuß erfordern, vleißig ersehn etc., unnd wo die superintendenten in den außzügen einichen unvleiß, verwarlosung, verschwendung oder unordnung befinden, daßelb vonstunden abstellen, einem spitlmaister auferlegen unnd ine dahin halten, das er zu außganng yedes jars von aller seiner hanndlung, einnemens unnd außgebens unnsern niderösterreichischen camer räthen vermüg der ordnung durch sy ime insonnderheit zuegestelt, erbabare [!] guete raittung thue, die außgestelten mengl richtig mach unnd solches unnotturfftiger weiß nit aufziehe etc. [4.] Verrer sollen sy, als offt von nötten unnd aufs wenigist drey oder viermallen in der wochen, samentlich oder sonnderlich in das spittal geen, ad partem unnd sonnsten guette fleißige nachfrag unnd erkhundigung halten, mit was vleiß, treu unnd ordnung spitlmaister, die arzt, caplän unnd all ander officier, dienner unnd diennerin irem ambt, diennst unnd bevelch geleben unnd nachkhumen, was vleißig ordnung unnd unnderschid zwischen den gesundten unnd khranckhen mit der sauberkheit, außwarttung, raichung der speisen und erzneyen gehalten werde. [5.] Die superintendenten sollen auch in der wochen, wann es sy für not ansiecht, die tagzetlen zu khuchen unnd kheller vleißig übersehen, die außgaben gegen annzal der armen unnd des diennst volckhs erwegen, unnd wo sy in dem allema untreu, unfleiß, unordnung, verschwenndung oder unnoturfftige khargkheit befunden, alßdann one verzug nach gelegenhait einsehung unnd wendung fürnemmenb etc. [496v] [6.] Item sy sollen in ein spittal bey yedem durchganng eisnen püxen, in weliche das almuesen gelegt werden khann, in die mauren zumachen verordnen, zu yeder zwen verkherte unnderschiedliche schlüeßl haben, die gefell alle Quottember heraus nemen unnd dem spitlmaister in sein emphahung anntwurtten etc. a Über der Zeile nachgetragen. b Korr. aus fürnennmen.