Page - 435 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

I. Österreich: Hofspitäler (Edition Nr. 1–16) 435 zu trost unnd den armen dürfftigen khranckhen mennschen zu ergezligkhait unnd guetem angaben erweitert, mit dem einkhumen zu statlicher unnderhaltung achzig armer manns- und weibspersonen unnd zwainzig armer maidlen gebessert unnd gemert aller vermüg der sonndern aufgerichten gab unnd stifftbriefs, wie es mit einnembung der einkhumen, haltung der armen leüth unnd allem anndern gehanndlt werden solle, ein lautere instruction außgeen lassen, dere auch bißheero nachganngen worden, so haben wir doch nach genuegsamer gehaltner inquisition unnd aller hanndt notwenndigen bewegnusen unnd bedenckhen dieselb instruction bey villen articlen menglhafftig befunden unnd derhalben dieselb nach zeittigen rath unnd gueten vorbetrachtung mit unnsern ansehenlichen räthen nachvolgunder massen und gestalt erbessert unnd geendert unnd gemert, wie wir dann des als herr unnd lanndsfürsst wol fueg, recht unnd macht haben. [1.] Erstlichen solle durch unns, oder aber wem wir das bevelhen, zu regierung des gannzen spitals wesen ein spitlmaister unnd an der bißheero gebrauchten superinntendenten stat durch unnsere niderösterreichisch regierung unnd camer ainen gegenschreiber, so beede erber, verstenndig unnd eines gueten geruchs aufgenomen unnd gehalten werden, deren yeder sein ambt innhalt nachvolgunder instruction erber, aufrecht unnd treulich hanndlen unnd verrichten solle etc. [14v] Spitlmaisters ambt [2.] Ain spitlmaister, so wir aufnemen, der solle bey unnser niderösterreichischen regierung unnd camer den gebüerlichen aydt thuen, inen alle schuldige gehorsamb laisten, ime solle auch ain schreiber unnd personen, auch roß, unnd sovil er zu verrichtung seines ambts nit entperen khan, gehalten, item parschafft traidt, wein, pethgewant, claider, leinen unnd wullen tuech, haußrath unnd alle varnuß, ausser unnd inner spitals, mit einem ordenlichen inventary durch unnser oder unnsern niderösterreichischen regierung unnd camer verordnung in sein verwarung unnd veranntwortung zuegestölt unnd eingeanntwurt werden. [3.] Er solle auch im spital neben der anzall personnen, so ime nach gelegenhait seiner person zuegelassen, wonen, ausser derselben über nacht on vorwissen unnsers stathalters unnser niderösterreichischen lannde oder, in seinem abwesen, des ambtsverwalter über nachts nit beleiben. [4.] Gedachter spitlmaister solle neben unnd mit unnseren ime zuegeordenten gegenschreiber macht, gewalt unnd bevelch haben, irer baider guetbedunckhen nach, doch mit unnserer vorgedachten niderösterreichischen regierung unnd camer vorwissen, zween caplän, ainen leyb arzt, ainen wundt arzt, ainen siechmaister, siechmaisterin unnd zuchtmaisterin, so guetes leymuets unnd berueffs, erber, verstänndig unnd gotsfurchtige personen sein, in unnser spital, auch von ir yedem der gebuerlichen aidt, von dem einkhauffer, zueschrater, khoch, khellner, casstner, mayr, wagenkhnecht unnd allen anndern des spitals unnd der armen leüth officiern, aber die gewenndlich phlicht, das sie des spitals unnd der armen nuz unnd frumen betrachten, nachtal [!] unnd schaden iren höchsten verstanndt nach warnena unnd wennden unnd iren diennst alles müglichen vleis außwarten wellen, aufzenemen, über die alle einen ordenlichen stat aufzerichten, inen nach gelegenhait jedes person diennsts und vleis besoldung zugeben unnd, wo vonnötten, gedachte personen zu straffen, gar zu urlauben und anndere widerumben aufzenemen etc. [15r] a -n- über der Zeile nachgetragen.