Page - 439 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

I. Österreich: Hofspitäler (Edition Nr. 1–16) 439 [28.] Er solle von dem spitlmaister, wann es die notturfft ervordert, unnd aufs wenigist monatlich ainen lauttern außzug alles emphanngs, außgebens unnd der varnuß ervordern, vleissig ersehen, und wo er in solchen außzügen ainigen unvleis, verwarloßung, verschwenndung unnd unordnung oder sonnst mangl befundt, dasselb von stundann merernennter unnser niederösterreichischen regierung unnd camer anzaigen, welche alßdann ime, spitlmaister, darzue halten sollen, damit er quottemberlich von aller seiner hanndlung, ein[17v]nembens unnd außgebens innhalt der ordnung, so inen unnsere camerräthen insonderhait zuegestelt, erbere guete raittung thuen unnd die außgestölten mengl richtig mach unnd solches unnotter weiß nit verzieche. [29.] Ferrner solle er sein vleissigs aufsehen, nachfrag unnd erkhundigung halten, mit waß vleiß, treu unnd ordnung spitlmaister, die arzt, caplän unnd alle annder officier, dienner unnd dienerin irem ambt, diennst unnd bevelch geleben unnd nachkhomen, was für vleissig ordnung unnd underschied zwischen den gesunden unnd khranckhen mit der sauberkhait, außwartung, raichung der speiß unnd erzney gehalten werde. [30.] Ferrner solle er, gegenschreiber, sein guet aufmerkchen habe, das die järlich pesserung zu Wolckherßdorf, deßgleichen in unnd ausser des spitals an dächern, meüren unnd zimern mit nuz unnd vorthail beschehe, auch unnser neu fürgenommen gebeu des spitals, wie wir yeder zeit ordnung geben, fürderlichen, treulichen verricht werde, unnd damit solche besichtigung sonnderlichen bey der herrschaft Wolckherßdorff umb sovil desto notdurfftiger beschehe, so haben wir jezigen unnd khonfftigen unnsern vizdomb in Österreich unnder der Enns bevolhen, das er neben dem spitlmaister unnd ime, gegenschreiber, järlichen zway mal geen Wolckherßdorf verraisen solle, dasselb besehena, wie das schloß sambt der zuegehör bey wesentlichen pau erhalten, daneben inquisition einziehen, ob die unnderthanen durch den yezigen unnd khunfftigen bstannd innhaber nit beschwert oder sonnst nachtaillige hanndlungen durch ine gebraucht werden, unnd im fall sy derlay unwiertschafft unnd schaden befundten, solches zu gebüerlichem einsehen alspald unnser niderösterreichischen regierung und cammer berichten. [31.] Es solle auch er, gegenschreiber, umb des spitals wiertschafft, auch des spitlmaisters hanndlung einnembens unnd außgebens ain wissen haben, jederzeit mit unnd beysein, nachfrag halten unnd selbs nachsehen, wie zu [18r] veld unnd hauß, mit erpauung unnd hinlassung der grundt, abgebung der hölzer, einbringung weinzehent, traidt, perckhrecht unnd annderer föchßung gehaust, waßmassen die bestendt unnd leibgeding gehalten werden, die zimer der khranckhen (wie der spitlmaister) täglich, oder so offt es von nötten, durch geen, sehen und bey den khranckhen erkhundigung halten, wie inen durch die caplän, arzt, siechmaister und siechmaisterin, item mit seuberung, khochen unnd raichung der speiß, tranckh, arzney unnd beclaidung außgewarth. [32.] Item auf dem cassten im speißgaden zu khuchen unnd khellner sehen, das gueter vorrath verhannden sey, sovill müglich vor verderben verhuet, wie in der khuchen dem gesindt unnd khranckhen khocht, wasmassen die wein raittung im kheller beschiecht, wie yeder seinem diennst außwartte, ob nit zuvil oder zu wenig besoldung gegeben werde, unnd, in wehe er unvleiß, nachtail, überfluß oder übrige khlueghait befunden, strags umb wenndung den spitlmaister ernnstlich anreden. [33.] Er,b gegenschreiber, solle alle tag des schaffers tag zetln ersehen unnd, waß a Korr. aus beschehen. b Am linken Rand: Schaffers tag zetln.