Page - 442 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

442 I. Österreich: Hofspitäler (Edition Nr. 1–16) bevelch nach mit ordnung beschehe, item nachfrag halten, wie die erzney würckhen unnd sich die pacienten halten. Wo dann ain schwerer casus fürfiele, mögen phisicus unnd wundtarzet der doctores der arzney, deßgleichen die wundtärzt zu sich ervordern (die zuerscheinen schuldig sein sollen), mit inen notturfft[20 r]tig reden unnd disputiern, wie dem patienden zuhelffen, unnd bey vermeidung unnser straff phisicus unnd wundärzt von den armen nichts nemen, sonnder sich on ihr besöldung benüegen lassen etc. [44.] Were auch sach, das der bestölt doctor unnd wundarzt sament oder sonnders aus der stat zu ainem khranckhen ervordert oder sonnsten außraisen wurde, so soll solches nit annderst dann mit vorwissen des spitlmaisters, unnd in dessen abwesen des gegenschreibers, beschehen, welche auch die tag ir yedes außbleibens, anndere taugentliche unnd geschickhte doctor unnd wundärzt bestöllen sollen, mit der beschaidenhait das des abwesenden besoldung nach anzal der zeit seines außbleibens ime abgezogen unnd den substituierten, so an seiner stat die müe tregt, bezalt werde, also das in alweeg der armen notturfft bedacht unnd unnser spital mit zwifacher außgab nit beschwert werde. [45.] Der wundtarzt soll sein zeug unnd die hanndt sauber halten, bedechtlich mit rath hanndlen, die schäden offmal seubern unnd die schadhafften, sovil müglich, zu hailung fürdern. [46.] Hieneben wellen wir, das die recept in der pössten appoteggen aine alhie geschickht werden unnd sol phisicus unnd wundarzt mit hohem vleis beim appodegger darob sein unnd halten, das die erzney, tranckh unnd annders zu rechter zeit frisch, guet, gerecht, wie es der phisicus unnd wunndarzt ordnen, gemacht unnd die khranckhen durch iren unvleiß oder verzug mit nichten verkhürzt noch aufzogen werden, was sy aber in der appodeggen unvleis, mengl unnd verzug befunden, den sy nit abstellen khönten, sollen sy dasselbe dem spitlmaister, oder in dessen abwesen dem gegenschreiber, zeitlich anzaigen, jeder wirdet wissen weiter einsehung fürzunemen. [47.] Alle monat sollen phisicus unnd wundtarzt die recept in beysein des spitlmaisters unnd gegenschreibers, auch, wo appodegger unnd phisicus irrig, etlicher anndern verstendigen doctorn die arzney abraitten und taxiern etc. [20 v] [48.] Damit auch allem unvleis fürkhomen werde, ist der facultet medicorum aufgelegt, das sy aufs wenigist im jar ain mal die appoteggen alhie ordenlich unnd vleissig visitiern, unnd was sy simplicia unnd ungredientia, die nit frisch, guet unnd gerecht sein, befunden, weckh thuen, unnd die appoteggen recht geschaffen zuversehen verordnen. Vom diennst aines siechmaisters unnd siechmaisterin [49.] Ain siechmaister unnd siechmaisterin sollen leinen und wullen gewannth, petgewannt, claidung unnd anndere notturfft auf die armen leüt durch ain spitlmaister in beysein des gegenschreiber mit ain ordenlichen inventary eingegeben werden, auch personen, wie es yederzeit die meinig der armen unnd khranckhen ervordert, insonnderhait aber dem siechmaister unnd siechmaisterin ain besonnder person zu hin unnd widerschickhen in notturfft der armen leüthen gehalten, die manßpersonen dem siechmaister, die weibspersonen der siechmaisterin in unnderschiedliche zimer geanntworth, auch die gesundten mannspersonen von den khranckhen manspersonen unnd die gesunten weiber von den khranckhen weibern in besonndere zimmer gethan, auch yedes gelt, khlaidung unnd annders, so er ins spital khombt, bringt, ordenlichen durch den siechmaister in beysein des spitalmaisters beschreiben, vor verderben unnd verruckhen verwart, jedem armen die fueß gewaschen, volgundts ain sauber peth, darbey