Page - 459 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

I. Österreich: Hofspitäler (Edition Nr. 1–16) 459 examinierung jedes glaubens verherrn unnd die hochwiertigen sacrament raichen unnd jeder zeit für die stiffter des spitals unnd zu furderist f(ü)r(stlicher) d(urchlauch)t als herrn unnd lanndsfürsten, umb desselben glieckhlichen regierung unnd gemainer anligen der gannzen cristenhait mit andacht zu Gott, dem almechtigen, bitten, daneben alle tag in der armen, zuvor der pettrisigen unnd khranckhen zimer ghen, sy zu dem gebett, glauben, gedult unnd hoffnung höchstes fleiß vermonen, cristliche guette trostspruch aus heilliger schrifft und gebett vorsagen, lesen unnd weisen, sy Gott, dem almechtigen, bevelchen, insonnderhait den armen, schwachen, pettrissigen, so in todtes nötten ligen, cristlichen unnd priesterlichen beystheen mit erkhlärung des pittern leitten unnd sterben unnsers herrn unnd sälligmachers Jesu Cristi fur [/] das menschlich geschlacht erlitten, sy trösten, vorpetten unnd zuesprechen, das sie on haß, neyd unnd aller innerlichen unnd eysserlichen beschwärung, mit guettem gewissen, glauben unnd hoffnung auf die grundtlose gnadt unnd barmherzigkhait Gottes unnd seines aingebornen suns Jesu Cristi leiden unnd sterben wie frumbe cristen, ir zeitlich ende unnd leben schliessen unnd sterben wellen, inen auch nach gethaner peicht das heillig hochwierdig sacrament raichen unnd mittaillen unnd darin nit verkhurzen, sonnder in allem, was ainem erbarn verständigen, cristlichen unnd gotsälligen priester in allem geburt unnd zuesteet, so alda nicht alles erzelt unnd beschriben werden khan, wie er dessen vor Gott, dem allmechtigen, am jungsten tag verantwortten wierdet muessen, verhalten. [22.] Fur solche sein, des caplan briesterliches am[bt und verricha]tung seines obbegriffens diennsst, dem er alles getreuen fleiß nachzuwartten wierdet müessen, solle ime für ferere vorderung unnd zu unnderhalt ain jar lanng neben dem zimer, wie obverstannden, so er im spitall haben solle, zubesoldung wochentlich durch den spitalmaister geraicht werden unnd gegeben ain gulden r(heinisch) unnd die notdurfft prennholz, damit soll er auch ersettigt sein. Dise jetzt vernombe unnd in namen irer f(ü)r(stlicher) d(urchlauch)t durch unns vorgenante verorndte comissari aufgerichten instruction unnd spitall ordnung sollen die verorndte [/] superintendenten unnd spitalmaister sambt allen andern des spitals inwonunden unnd aufgenumben personen in allen unnd jeden hierin begriffnen articln bis auf ir f(ü)r(stlicher) d(urchlauch)t ferer genedigistes wolgefallen unnd verordnung würckhliche volziechung laisten, allerdings geleben unnd nachkhumen unnd sich davon annders nichts abhalten noch verhindern lassen, des sich dann hochgedachter f(ü)r(stlicher) d(urchlauch)t wegen die obgedachten herrn comissari gwislich unnd endlich gegen jedem, so dise instruction unnd ordnung angeet unnd begreifft, ungezweiffelt versechen wellen, wie wir dann zu urkhundt unnsere hanndtschrifft unnd pedtschadl hierunder gestelt haben. Geben unnd beschechen zu Aussee, dem vierzechenden tag Aprilis nach Cristi unnsers lieben herrn geburde im funffzechenhunder unnd im achtundsechzigisten jar. H(ans) A(dam) Praunfalckh G(eorg) S(igmund) Trubenegkh Bernhardin Rindtschadt zu Schiechleitten, vizdomb in Steyr Er. Borsch Collatio a Sinngemäße Ergänzung nach A’ aufgrund der Beschädigung im Falz der Editionsgrundlage.