Page - 571 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

IV.3 Salzburg: Salzburg (Stadt) – Bürgerspital, Bruderhaus und Leprosenhaus (Edition Nr. 31–35) 571 vleis haben, damit die pfrundt und speis ordenlich gekocht werde und unbeschedigt. Wurde aber sehr ungleichs, unerberigs und ungetreues bey ir ainem erfunden, das werde gestrafft wie oben von dem unndtermaister geschrieben steet. [32.] Item es sollen auch die knecht des spitel, so sy geen in dy stat mit der puechsen und allmusenkorb, und was darein wird von gellt unnd brot, treulich haymbrinngen [133r] und unverrugkht hallten. So aber annders bey ir ainem erfunden wurde, der sol gestrafft werden, wie vor von dem unndermaister geschrieben steet. [33.] Item es sol auch der unndermaister und auch die geordenten personen bey dem ofennhaytzer darob sein, daz dieselben vleis haben, zu rechter zeit unntterkhönnten und haytzen und das solhes bescheh, den armen leuten zu nutz und guter nyessung und besonnder daz solhs feur versichert und bewart sey. So aber die haytzer etwas saumlich unnd nachlessigklich darinn hanndlen, die werden durch den unndtermaister gestrafft mit vorhalltung der pfrunt desselben tags. [34.] Item es sol auch weder man noch weyb in dem pad unschämigklich noch unbedegkht nit geen, sytzen noch ligen, wann ainem allten ist schimpflich ungeschambt sein. Wer aber des gefunden wurde, dem wer die pfrundt wein desselben pad genommen und vorhallten durch den unndtermaister. Abb. 77: Salzburg; Bürgerspital- kirche St. Blasius (erste Hälfte des 14. Jahrhunderts, 1350 geweiht, 1410–1428 Emporeneinbau, 1577 Gewölbeeinbauten) (Foto: Martin Scheutz, 2012).