Seite - 391 - in Spital als Lebensform - Österreichische Spitalordnungen und Spitalinstruktionen der Neuzeit, Band 2

I. Österreich: Hofspitäler (Edition Nr. 1–16) 391 khrankhen gen, sich der cur vergleichen, kheiner dem anndern in sein cur greiffen, yeder mit irer khunst unnd vleiß treulichen außwartten, ratten unnd helffen, die recept, so phisicus in die apotegkhn schreibt, dem siechmaister oder siechmaisterin zuestellen, den schwachen confortatif unnd labungen, auch dennen, so erzney nemen sollen, ychtes für das undeien unnd grausen verordnen, dem siechmaister unnd siechmaisterin bevelchen, zu was stunden yeden die verordnet erzney zugeben, die speiß unnd trankh khöcht unnd geraicht werden solle, welche khrannkhen sich zum todt oder gesundt schickhen, auf das man auf die selben sehen unnd weittere verordnung thuen müg. Phisicus soll bey der aderlaß yederzeit bleiben, damit dießelb seinem bevelch nach mit ordnung beschehe; item nachfrag halten, wie die erzney würkhen unnd sich die pacienten halten. Wo dann ein schwarer caßus füerfielle, mügen phisicus unnd wundarzt die doctores der erzney, deßgleichen die wundarzt zu sich erfordern, die zuerscheinen schuldig sein sollen, mit innen notdurfftig reden unnd disputieren, wie dem pacienten zuhelffen, unnd bey vermeidung unser straff phisicus unnd wundarzt von den armen nichts nemen, sonnder sich an irer besoldung benüegen laßen etc. [30.] Ware auch sach, das der bestelt doctor unnd wundarzt sambt oder sonnder aus der stat zu einem khrannckhen erfordert oder sonnst außraisen wierdt, so solches nit annderst dann mit vorwißen der superintendenten beschehen, welche auch die täg ir yedes außbleibens, anndere taugenlich und geschickhte doctor unnd wundarzet bestellen sollen; mit der beschaidenhait, das des abwesenden besoldung nach anzal der zeit seines ausbleibens ime abgezogen unnd dem substituierten, so an seiner stat die müe tregt, bezalt werde, also das in alweg der armen notdurfft bedacht unnd unnser spittal mit zwifacher außgab nit beschwärt werde etc. [31.] Der wundtarzt soll sein zeug unnd die hanndt sauber halten, bedächtlich mit rat hanndlen, die schäden offtmalen seübern unnd die schadhafften, sovil müglich, zur haillung fürdern. [32.] Hieneben wellen wir, das die recept in der pessten apotegkhen einen alhie geschickht werden unnd soll phisicus unnd wundarzt mit hohem vleiß beim apotekher darob [498/2r] sein unnd halten, das die erzney, trannckh unnd annders zu rechter zeit frisch, guet, gerecht, wie es der phisicus unnd wundarzt ordnen, unnd die khrannckhen durch ihren unfleiß oder verzug mit nichten verkhürzt noch aufgezogen werden, wo sy aber in der apoteckhen unfleiß, mangl unnd verzug befinden, den sy nit abstellen khünten, sollen sy daßelb dem superintendenten zeitlich anzaigen, die werden weitter wißen einsehung fürzunemen. [33.] Alle monat sollen phisicus unnd wundarzt die recept in beysein der superintendenten unnd spitlmaister, auch, wo apothekher unnd phisicus irrig, etlicher anndern verstenndigen doctorn die erzney abraitten unnd taxieren etc. [34.] Damit auch allem unfleiß fürkhumen werde, haben wir der facultet medicorum aufgelegt, das sy aufs wenigist im jar einmal die apotekhen alhie ordenlich unnd vleißig visitiern, und wo sy simplicia unnd ingredientia, die nit frisch, guet und gerecht sein, befunden, weckh thuen, unnd die apotekhen recht geschaffen zuversehen verordnen etc. Vom diennst aines siechmaisters unnd siechmaisterin etc. [35.] Ain siechmaister unnd siechmaisterin sollen leinen unnd wullen gewandt, petgewandt, claidung unnd anndere notdurfft auf die armen leüth durch ein spitlmaister mit vorwißen der superintendenten mit einem ordenlichen inventary eingegeben werden, auch personen, wie es yederzeit die menig der armen unnd khranckhen