Seite - 411 - in Spital als Lebensform - Österreichische Spitalordnungen und Spitalinstruktionen der Neuzeit, Band 2
Bild der Seite - 411 -
Text der Seite - 411 -
I. Österreich: Hofspitäler (Edition Nr. 1–16) 411
[6.] Wann sich auch ainiche verwanndlungen mit den unnderthonnen unnd guettern
zu bemeltem spital gehörig zuetragen, so solle alle verwanndlung, stifftung unnd störung
yeder zeyt vor ainem unnserm vizdomb beschehen unnd, was not, daruber in unnserm
[522r] namen geferttigt unnd aufgericht, damit alle verordnung unnd zeitlichkhait
verhuet, unnd man wissen muge, wie die verwanndlung gehandlt werden.
[7.] Bey allen durchganngen des spitalls sollen sonndere taffeln, mit khlainer
vermeldung der armen nodturfften unnd almusen begerundt, unnd darneben eisen
puchssen, in weliche das almusen gelegt, einzumauren verordnet, zu yeder zween
unndterschiedliche schlüssl gemacht, den ainen in die truchen im vizdomb ambt gelegt
unnd den anndern dem spitalmaister zuezustellen, volgunndts zu yeder Quottember
aufgespert unnd dem spitalmaister in empfanng geanntwort werden.
[8.] Ain spitalmeister sambt seiner hausfrauen sollen ir geburliche wonung, zimer,
stuben unnd camer in dem spital mit aller geburlicher notturfft versehen haben unnd
demselben spital unnd haußhaben zu unndterhalttung der armen leüt vleissig unnd
mit allen treuen vorsein, inen wol wartten unnd sonnderlich solle die spitalmaisterin
auf die khuchen unnd was ir in dem hauß sachen insonnders zuthuen geburt, also daz
die khöchen unnd die anndern zuegeordneten personnen yeder zeyt mit khochen, prot
pachen, spinnen, waschn unnd anndere dergleichen sachen nicht versaumen, sonnder
alles vleyß unnd ordennlich verrichten, ir vleissig aufmerckhen haben, sich auch gegen
den armen personnen glimphlich erzaigen unnd beweisen, die speiß, die inen täglich zu
irer undterhalt zugeben verordent wirdet, an fleisch- unnd fischtagen sauber unnd wol
gekhocht raichen unnd unndter den khranckhen unnd gesundten nach gelegenhait der
zeyt unnderschiedt halten lassen.
[9.] Es sol sich auch der spitalmaister unnd sein hausfrau vor ainicher gasstung oder
pannckhatierung in dem spital bey vermeidung unnserer ungnad unnd straff gennzlichen
enthaltten, sonnder ir gebürliche speiß unnd trannckh, wie inen die verordnet wierdet,
mit dannckh annemen unnd kain sonndere khuchen oder ainiche sunnderung darinnen
mit nichte machen oder furnemen.
[10.] Er, spitalmaister, sol auch von dem gelt der ain tausennt gulden, so ime von
unns zu Quottembers zeitten zuraichen verordnet, auch von den annderen einkhumen
deß spitalls allerlai speiß, trannckh, holz unnd all annder hauß[522v]nodturfften yedes
zu seiner ordennlichen zeyt, mit geringistem unnd wenigistem chossten, so muglichen
ist, einckhauffen unnd alßdann diser volgunnden ordnung gemäß täglichen aus seiner
verwarung raichen unnd herfür geben unnd sonnderlichen gedacht sein, dieweil solich
spital schwer unnd geringe diennst unnd zehent traidt hat, das soliches nach der maß
zu rechter zeyt unnd guetter gelegenhait zu der mull unnd wider darvon gebracht,
volgunndts zu roggl pachen lassen unnd, wievil aus ainem mezen wierdet, aigenntlich
beschreiben unnd yedem sein gebur raichen unnd dermassen durch in unnd sein weyb
vleiß zubrauchen, damit zu khuchl unnd kheller nicht unuz verschwenndt, sonnder in
solichem haußhaben in allen dinngen guette ordnung gehalten werde, unnd von seinem
einnemen unnd außgeben alle monat obvermelte unnsere verordneten superintendenten
ain lautter particular, was yeden tag unnd wochen sonnderlichen außganngen, übergebe
unnd volgunndts mit außganng deß jars ain volckhumen, ordennliche raittung thue, umb
weliche sein raittung angeregte superintendenten ine, spitalmaister, zu quittiern macht
haben solle.
[11.] Für sein, des spitalmaisters unnd seiner hausfrauen, bemuehung sollen inen
järlichen für besoldung ervolgen vierzig pfhunndt pfening.
Spital als Lebensform
Österreichische Spitalordnungen und Spitalinstruktionen der Neuzeit, Band 2
Entnommen aus der FWF-E-Book-Library
- Titel
- Spital als Lebensform
- Untertitel
- Österreichische Spitalordnungen und Spitalinstruktionen der Neuzeit
- Band
- 2
- Autoren
- Martin Scheutz
- Alfred Stefan Weiß
- Verlag
- Böhlau Verlag
- Ort
- Wien
- Datum
- 2015
- Sprache
- deutsch
- Lizenz
- CC BY-NC 3.0
- ISBN
- 978-3-205-79639-8
- Abmessungen
- 17.5 x 24.7 cm
- Seiten
- 722
- Kategorie
- Medizin