Seite - 412 - in Spital als Lebensform - Österreichische Spitalordnungen und Spitalinstruktionen der Neuzeit, Band 2

412 I. Österreich: Hofspitäler (Edition Nr. 1–16) [12.] Wein yeden tag inen baiden annderthalb maß. [13.] Dem spitalmaister soll unnd mueß zu hilff ain haußkhnecht unnd ain pueb, die er zu allerlai sachen unnd notturfften hin unnd wider zuschickhen, auch zum tisch auf- unnd abzutragen, unnd die in annderweeg gebrauchen mug, gehalten werden, dem khnecht zu besoldung sechs pfunndt pfening, wein ain tag ain halbe. [14.] Dem pueben, so auch sonnderlichen dem caplan in der khirchen unnd zu altar diennen unnd auch morgen unnd abents das ave Maria leitten sol, vier pfunndt pfening, wein ain tag ain seitl ervolgen. [15.] Ainer khöchin, die der khuchen unnd dem pachen sambt anndern, so ir bevolhen, außwart, damit die spitalmaisterin anndern haußgeschäfften unnd den armen, auch den gartten, damit zu täglicher khuchen notturfft was darinnen erzuglt, dest vleissiger außwartten unnd versehen muge, zu besoldung funf pfunndt pfening ervolgen, wein ain tag ain halbe. [523r] [16.] Noch muessen der unvermeidenlichen nodturfft nach zwo diernen, so zu khuchl unnd den armen bey tag unnd nacht helffen, wachen, pötn, wischen unnd waschn, wie es die notturfft erfordert unnd sy durch ain spitalmaister oder sein hausfrau verordnet, gehalten werden, jeder zu lon vier pfunndt pfening, s(un)t acht pfunndt pfening, gegeben werden, wein in baiden deß tags ain halbe. [17.] Dise vorgemelte personnen sollen ir malzeit in des spitalmaisters zimer haben unnd nemen unnd sich der speiß wie die armen phruendtner benuegen lassen. [18.] Ain caplan, der aines erbarn crisstlichen wanndls unnd zimblichen alters ist, sol aufgenumen unnd unnser stifft zu Welß, sanndt Georgen genannt, sambt derselben zueghörigen behausung, unnd waß darzue für einkhumens gehörig, eingegeben werden, darzue wir ime fur den tisch unnd unnderhalttung bewilligt zwenunnddreissig pfunndt pfening aus dem spital zuraichen, biß so lanng das derselb durch ain annder beneficium, deß sonnstn kainen priester ertragen mag, versehen werden mugen, dagegen soll er schuldig sein, das er der khirchen, wie sich geburt, mit ordennlichen meßlesen, erbar, zuchtig unnd andächtigclichen unnd am Suntag unnd anndern gewönndlichen feyrtagen vesper unnd ambter sing, auch mit verkünndung deß wort Gottes, dem gottsdiennst außwartten unnd sonnderlichen sol er nit unnderlassen, wochenlichen ain meß in sannt Georgen capeln, wie die gestifft, zuhalten. [19.] Item die armen, so offt von nötten, unnd aufs wenigist zu den Weinachten, Ostern, Pfingsten unnd unnser frauen Himelfart peicht hörn unnd das hochwierdig sacrament des altars raichen, alle Sambstag zu abent in der capeln ain salve regina singen unnder volbringung des Gotts diennsts fur unnser liebste gmahl löblicher gedechtnuß, auch unnserer unnd irer lieb voreltern seln, dergleichen für unnser unnd unnserer geliebten sune unnd nachkhumen, gluckhliche regierung unnd gemaines anligen der christlichen khirchen mit andacht zu Gott, dem almechtigen, bitten unnd insonnderhait mit vleyß unnd ernnst den armen in totts nötten beysteen, mit furzaigung des crucifix vermonen, trösten unnd vorpetten unnd zuesprechen, das sy on haß, neyd, mit guetter gewissen, glauben [523v] unnd hoffnung auf die grunndtlose gnad unnd barmherzigkhait Gottes frölich wie frume cristen sterben wollen, inen auch nach beschehner peicht den zartten fronleichnamb unnsers seligmachers Jesu Cristi mittaillen, auch mit der heilligen öllung versehen unnd niemanndt verkhurzen unnd sy auch sonnstn durch Gottes wortt treulichen vermonen unnd unndterweisen, damit sy daz jhenig, so inen geraicht wierdet, mit aller dannckhperkhait empfahen, dardurch der almechtig Gott gelobt unnd geert werde, unnd sy auch zuthuen schuldig sein, wo aber gemelter caplan, wie vermelt, den