Seite - 415 - in Spital als Lebensform - Österreichische Spitalordnungen und Spitalinstruktionen der Neuzeit, Band 2

I. Österreich: Hofspitäler (Edition Nr. 1–16) 415 [33.] Durch das gannz jar soll yeder armen personnen morgens ain seitl unnd zum abentmall auch ain seitl wein in sein khänndl oder amperlein gegeben werden. [34.] Alle Sonntag unnd feyrtag soll man yedem armen zum morgenmal durch das gannz jar ain sembl geben. [35.] Wann auch ein person khrannckh unnd schwach ist, darauf sonnderlich der spitalmaister unnd sein hausfrau achtung haben, dem solle, was ime diennstlich ist, gekhocht unnd geraicht unnd sonst mit aller notturfft treulich außgewart unnda anb im nicht versaumbtb werden. [36.] Item ainer yeden person ain tag zu irer unndterhalttung rockhen haußprott zway röckhl, wie sy nach gelegenhait unnd wolfail des traidts aus ainem mezen gepachen, ungefär auf zwen pfening. [37.] Der spitalmaister unnd sein hausfrau sollen mit höchstem vleyß ir aufmerckh haben, damit den armen leütten ir unndterhalttung unnd speiß von khuchen unnd kheller sauber, vleissig unnd guett gekhocht unnd geraicht, auch mit pötth, tisch unnd annderm laingewanndt rain unnd sauber gehaltten, zu rechter zeyt gesaubert unnd gewaschen, damit den armen an solichen khain abganng zuegefuegt werde. [38.] So unnd wann das halb jar verstreicht, die raittung aufgenumen, alßdann wirdt man in derselben befinnden, wievil mer arm personen von den tausent gulden reinisch, auch dem einkhumen, so neben denselben bei dem spital beliben, hinfurter erhalten werden mugen, dieselben alspald einzunemen unnd, waß ferrer von nöttn, verordnen. [39.] Wann dann der armen personnen aine mit todt vergeet, sol dieselb mit allen christlichen [525v] ceremonien zu dem geweichtn erdrich in Gotts ackher bestätt werden, deßgleichen den verstorbnen gewönndliche exequie der erst, sieben unnd dreissigist mit aller andacht volbracht unnd darundter in alweg wolernennter unnserer geliebsten gemahl loblichister gedechtnuß, deßgleichen unnserer unnd irer lieb voreltern unnd dann unnser unnd unnserer geliebten sune unnd deren nachkhumen, glückhliche regierung unnd wolfart, auch umb alles gemain anligen der heilligen christlichen khirchen mit innigkhait unnd demuet gegen Gott gebet worden unnd sol der caplan, spitalmaister unnd alle arme leyt, so one beschwerungen, mitgeen. [40.] Unnd so also ain arme person in Gott verschaiden unnd armuet halb umb Gottes willen hinein genumen were, soll alleß das, so sy erstlich in das spital mit ir eingebracht, dem spital den armen guet aigenthumblich beleiben, ob aber dieselb person sich in das spital einckhaufft oder ainer person in zeyt unnd weil, so im spital gewesen, erblichen was zuegefallen wäre, das alles mag sy in beysein guetter, erbarer leyt wohin unnd wem sy will, doch auch in beysein unnd mit vorwisen deß spitalmaisters, tesstiern unnd verschaffen; ob aber ain person untestiert abstuerb unnd obgelauttermassen waß verlassen wurde, so sol der halb thail dem spital, dem armen zu guett, unnd der annder halb thail des verstorbnen negstn erben zuefallen, geraicht werden unnd beleiben unnd so die claidung derselben verstorbnen person, so guet, mag dieselb der khunfftigen person, so eingenumen, wider gegeben oder den diennstpotn, damit sy dest williger unnd vleissiger, gereicht werden. [41.] Beschließlichen sollen die superinntendenten dem spitalmaister bey vermeidung unnserer ungnad unnd straff unnd enntsezung seines ambts bey seinem aydtt auflegen unnd einpinnden, das in bemeltem spital aller fravel unnd muetwillen, gozlesterung, a Folgt versehen, getilgt. b–b Am linken Rand nachgetragen.