Seite - 457 - in Spital als Lebensform - Österreichische Spitalordnungen und Spitalinstruktionen der Neuzeit, Band 2

I. Österreich: Hofspitäler (Edition Nr. 1–16) 457 unnd schenckhheüser zulauffen unnd [zu] [besuechen khainesa]weegs ausgeen, sondern im spital bleiben, alle unzucht in wortten unnd werckhen vermeiden, wo sich aber aine oder mer personen uber des spitalmaisters guettig undtersagen nit massen wolten, mag er dieselbig mit vorwissen unnd mässigung der superintendenten in straff nemben unnd, da solche erste andere und drite straff nit angesehen sein wurde, die selbigen straffmässigen personen andern zu ainem exempel unnd warnung des spitals gestrachs verweisen unnd ferer darein nit genumben werden. [/] [13.] Item alle ausgaben, so in khlaydung der armen oder andern extraortinari beschechen sollen unnd ain armer etwo selbst sovil vermugens nit het sich zu khlaiden, solle solches der spitalmaister an die superintendenten bringen unnd nach irem beschaidt und ratschlag, so er deswegen nemben unnd in raittung einbringen solle, hanndlen unnd so ain person von des spitals einkhumen bekhlaidet werden mueste, solle ain mannßperson ain graber rockh mit ainem schwarzen linckhen ermbl und ainer weibs person ain graber mandl unnd ain schwarzen unnderrockh bekhlaidet werden. [14.] Der spitalmaister solle auch jeder zeit, sovil müglich, dise ordnung halten, das die armen alweg in ainer stuben mit und beyeinannder essen, da sich aber begäbe, das aine oder mer personen aus innen schwachait oder alters halben nit aus dem pedt möcht, der oder denselben soll ir notdurfftig unndter haltung zuegetragen unnd geraicht werden. [15.] Des morgens solle den armen leütten alwegen umb aindliff uhr unnd das nachtmall umb funff uhr gehalten unnd gegeben, doch solle jeder zeit vor empfachung der malzeitten zu dem gepet zeitlich geleütt werden unnd also vor unnd nach der malzeit sollen die armen leuth morgens unnd abents niderkhnieen, ir gebett sprechen unnd dem guettigen Gott lob unnd dannckh sagen, fur die stiffter unnd woltätter des spitals, auch alles obliegen gmainer cristenhait bitten unnd also ob vor unnd nach tisch alles unnuz geschwäz vermeiden, sonnder aller zucht unnd erbarkhait sich mans unnd weibs personen verhalten. [/] [16.] Zu morgens unnd der fruesuppen solle den armen leutten alweg ain richt, es sey ain milich, vleisch oder anndere suppen nach gelegenhait der zeit oder ain khoch geben werden und zu mittag mal zwo speiß, auch nach gelegenhait der zeit oder was man gehaben mag, unndertags jedem sein jausen prot, die gebürlich notdurfft, doch das sy nit fursparen, aufheben oder aus dem spital annder leütten umb sunst oder geldt vergeben oder austragen, also auch des abentmall soll innen alweg zwo gehackhte speiß geraicht werden. [17.] In der wochen Montags, Erchtags unnd Pfinztags soll den armen leutten jedes malls zu morgens oder abents ain richt fleisch; am Suntag aber oder sunsten, so ain feyrtag in der wochen ist, zu morgens unnd abents jedesmals ain richt fleisch sauber unnd vleissig alles gekhocht geben werden; so aber khranckhe personen, die nit woll essen mugen, verhanden, den solle man zu weillen in der wochen nach gelegenhait wein und waizen brott, auch sunst nach irer schwachait ayr oder sonnst geringe speiß mittaillen, es solle auch im jahr zu den heilligen zeitten, festen unnd feyrtägen, auch so die armen leüth mit dem hochwierttigen sacrament versechen werden, in das speiß mit dargebung derselben, auch aines gebürlichen zimblichen trunckhs weins, die notdurfftig, darraichen beschechen. [18.] Item so in veldt unnd hauß arbaitten furfallen, so mit den diennst potten unnd aussertag lönner nit woll verricht werden khünden, solle spitalmaister die spital personen, a Sinngemäße Ergänzung nach A’ aufgrund der Beschädigung im Falz der Editionsgrundlage.