Seite - 812 - in Spital als Lebensform - Österreichische Spitalordnungen und Spitalinstruktionen der Neuzeit, Band 2

812 VII.3 Oberösterreich: Freistadt – Bürgerspital (Edition Nr. 98–103) [4.] Item alle tag in das spital zwen wegkh prot. [5.] Item am Faschangtag gibt man ainem jeden armen menschen ainen khrapfen, irem ca[43r]plan, dem priester zwen khrapfen und dem mesner auch zwen khrapfen. [6.] Item in der Vasten ainem jedem armen menschen in der wochen drey häring, am Montag ain, am Mittwoch aim unnd am Freitag ain. [7.] Item zu den Ostern sol man inen pachen lassen aynen flegkhen, auch weichpraten unnd ainem jeden armen menschen zwai ayr geben. [8.] Item mer, wann sy am Osterabent gespeist werden, sol man zum speisen geben ain khandl wein. Es sol auch der spitalmeister bei ime khochen lassen den armen leiten fisch in ainer suppen, einem jeden ain stuckh unnd sunst zwai richtl darzue, dasselbig inen hinausschickhen unnd ainem jeden ain massel wein. [9.] Item mer sol man der khochin geben im spital zu den Ostern pheffer unnd saffran, das sy die feirtag genug hab. [10.] Item von Ostern bis auf Pfingsten ainem jeden [43r] armen menschen im spital alle Sambstag ain ay unnd an dem spitalhoff ainem jeden zwar ayr. [11.] Item wann sy mer gespeist werden am Pfingstabent, sol man geben in die khirchen zum speisen ain khandl wein. Mer sol man geben den armen leiten das schmalz khoch unnd was man inen sunst darzue bei dem spitalmaister khochen wil lassen, auch ainem jeden ain massl unnd inen dasselbig hinaus in das spital tragen. [12.] Item zu der khirchweich bei unnser frauen sol man den priestern, schuelmaister, mesner unnd den anndern khirchdienern zum morgenmal essen unnd trinkhen, auch in die khirchen den schuelern ain suppen und trunkh wein unnd pier geben. [13.] Item am sanndt Johanns tag sol man der gleichen, wie gemelt ist, geben. [14.] Item wann die armen leit heygen, sol man inen das essen bei den spitalmaister khochen unnd sambt dem trinkhen hinaus schickhen. [44r] [15.] Item zu den Weinnachten werden die armen leyt am Weinnacht abent gespeist, sol man geben zum speisen ain khandl wein unnd fisch in ainer suppen khochen, ainem jeden ain stuckh und einem jeden ain massl wein, auch inen daß essen unnd den wein hinaus schickhn. [16.] Item am Weinnacht abent ainem jeden armen menschen ain stuckh rauchwerkhen und ainen halben khäß. [17.] Item zu sanndt Johanstag in den Weinnacht feirn, zu sanndt Johanns wein zwo khandl. [18.] Item mer sol man den holzhackhern unnd holz fuerer zuessen und zu trinckhen geben. [19.] Item wann die armen leit etwas arbaitn, sol man inen zum unndertagen auch ain khäß unnd prat sambt ainem trunkh pier geben. [20.] Item am spitalhoff sein drei person gewesen, den hat man die pfruent geben, den zwaien personen den lann, aber der dritten nit, ist ain khlaines dierndl gewest, unnd ainem [44v] jedem im tag zwier [!] zwai stuckh fleisch. [21.] Item dem gesindl am spitalhoff sol man geben zu sanndt Merten tag zwo khandl pier, zu den Weinnachten zwo khandl, zum Faschang tag zwo khandl, zum Ostertag zwo khandl unnd zu den Pfingsten zwo khandl pier. [22.] Item wann man den zehent einfurt, sol man inen auch geben ain khäss unnd prat, auch ain trunckh pier darzue. [23.] Item dem mesner alle Sambstag siben stuckh fleisch. [24.] Item dem mesner vom oblat pachen alle jar 3 tl. den.