Page - 408 - in Spital als Lebensform - Österreichische Spitalordnungen und Spitalinstruktionen der Neuzeit, Volume 2

408 I. Österreich: Hofspitäler (Edition Nr. 1–16) Unnd wann nun obangezaigte gepeu erweitter- und pesserung an bayden spitallern unnd kirchen hie und zu Hallstat der massen in das werch gericht unnd e(uer) kh(unigliche) m(ajestä)t obgenannte vorhabunde bewilligung der 1.000 tl. den. järlich darauff verordnen und anschaffen, so achten wir, das an baiden orten ain guete anzall armer leut begabt unnd unnderhalten, unnd unns verhoffens die arbaytter sich desster lieber zu bayden wesen thun unnd dester leichter zubekhumben sein, unnd e(uer) khu(niglichen) m(ajestä)t ir ain ewige gedächtnuß unnd danckhsagung machen und die armen leut für e(uer) khu(niglichen) m(ajestä)t unnd derselben geliebten erben umb merung der loblichen Gots gab bey bayden sieden, auch alle anndere wolfart Gott, den hern, on unnderlas pitten werden. Das alles haben wir e(uer) khu(niglichen) m(ajestä)t auf obangeregt derselben genedigist schreiben unnd bevelh zu gehorsamer antwort nit wellen verhalten, deren wir uns auch hiermit in aller diemuet bevelhen thun, datum Aussee, den 17. November etc. anno im 1552. Der römischen zu Hungern unnd Behaim etc. khu(niglicher) m(ajestä)t erzhertzogen zu Osterreich unnserm allergenedigisten herrn Sebastian Tunkchl, verweser zu Aussee Georg Spiller, salz ambtman zu Gmunden Zu hannden seiner khu(niglichen) m(ajestä)t hofcammer Nr. 4 Ordnung des Hofspitals in Wels. Wien, 1554 Juli 16 Archiv: ÖStA, HKA, Gedenkbuch 69, fol. 521r–526r (mit Kollationierungsvermerk) [521r] Instruction unnd ordnung des neuen hofspitals zu Welß Instruction unnd ordnung unnsers neuen spitalls, weliches wir Got, dem allmechtigen, zu lob unnd ehr, auch zu lob, hilff unnd unnderhalttung der armen notturfftigen personen, in unnser stat Welß aufzurichten, genedigclichen verordnet haben, wie unnd was gestalt in ernenntem spital alle sachen gehanndlt unnd die armen leütt unnderhaltten sollen werden. [1.] Erstlichen nachdem wir mit stätter hofhalttung den wenigern thail in unnserm fursstenthumb Österreich ob der Enns, auch zu furfallunden sachen unnser regierung unnd camer alhie zu Wienn gemeltem spital zu weyt gesessen, so haben wir zu superintendenten den edlen unnsern lieben getreuen Balthasarn von Presing unnd Jacoben Giennger, unnsere räte alls gegenwüerttige unnd khunfftige unnsere lanndshaubtleütt unnd vizdomb daselbst ob der Enns, alls die jederzeyt zu Linnz mit stätter wonung unnd den sachen gar an der hanndt sein, biß auf unnser genedigist wolgefallen furgenumen unnd verordnet also unnd dergestallt, das sy volmächtigen bevelch unnd gwalt haben sollen, irem guetbedunnckhen nach in furfallenden sachen des spitalls unnd derselben armen leyt nuz unnd notturfft zum treulichisten zubedennckhen, maß unnd ordnung zugeben unnd, so inen was beschwärlichs furfelt, dasselb an unns oder obbemelte unnser regierung unnd cammer umb beschaidt yeder zeyt gelanngen zu lassen; sy sollen auch macht haben, wann es die nodturfft erfordert, ainen spitalmaister