Seite - 160 - in INSTRUKTIONEN UND ORDNUNGEN DER STIFTSHERRSCHAFT KLOSTERNEUBURG - Quellen zur Verwaltung sowie zur Land- und Forstwirtschaft einer geistlichen Grundherrschaft in der Frühen Neuzeit

Edition [§ 11] Er soll in albeg unnuz und ubrigen cössten verhuetten, anzall der person- nen, so man unnderhallten mueß, aigenntlichen aufschreÿben und offt ab- zellen, die tierniz mit ordnung ernstlich und sträfflich hallten, damit nichts widerwärttigs gehanndlt, noch fuergenomen werde. All ubrig unnd unnuz personnen, die sich beÿ dem clösster oder in des selbigen zuegehörungen heisern ennthallten wolten, soll er abschaffen und aufs pöldist weekh thain, aber die armen, ellennden hausarmen leut albegen bevolhen haben. [§ 12] Ime sollen alle schlussl zu allen thorn zuegestellt werden, das durch sein verordnung mit auf- und zuespern, summer und winter zeitten, morgens und nachts guet und getreu verwarung beschehe. Unnd nämblichen, wenn man beÿ dem gotshauß wein schenckht , solle er bestellen, wann sich aufruer zuetriegen, das mit der eill zuegeschlagen und gespert werde, damit er sambt des gotshauß diennern, die ime hierinnen auf sein erfordern gehorsam sein sollen, desto stadtlicher hanndlen unnd die aufruerigen zu der straff bringen muge. [§ 13] Ob zu zeitten zu dem gotshauß versehenns oder unversehens erlich gesst khomen, soll eer in unnserm namen emphahen und mit ziml[i]cher not- durfft, wie sich aines ÿeden stanndt nach gebuert, gwierten und versehen. [§ 14] Wann er in des gotshauß sachen und hanndlungen uber lanndt geschickht wierdet, soll er mit zimlicher zerung versehen werden. [§ 15] Dieweil aber nit all zuefallenndt sachen, so ainem hoffmaister des gotshauß und unnser notdurfft zuhanndlen gebuern, diser zeit muglich in schrifft zuverfassen, derohalben behallten wier unns gegen ime nach nuz und not- turfften des gotshauß in sollichem sambt vermellt anzaigen und khunfftigen bevelch bevor, die zu mindern und zu merern, darinn er sich laut seines revers und phlicht in allweg getreul[i]ch und gehorsamlich hallten solle. Zu urkhundt hab ich, Bernhardt Schlacher , zubecrefftigung diser innstruction mein innsigl und hanndtschrifft hierunden fuergetruckht. [E] Act(um) den Phinztag vor Sebastiani anno im ain und funffzigi(sten). [L.S.] Bernhart Schlaher m.p. 160