Seite - 205 - in INSTRUKTIONEN UND ORDNUNGEN DER STIFTSHERRSCHAFT KLOSTERNEUBURG - Quellen zur Verwaltung sowie zur Land- und Forstwirtschaft einer geistlichen Grundherrschaft in der Frühen Neuzeit

3. Das Hofmeisteramt [§ 19] Er soll auch jeder zeit aufsehen und vleiß haben, auf daz beÿ nächtlicher weill alle tohr gespert sein, die schlüssel ohne auf zug umb die gesezte stundt gewißlich an daz deputirte orth gebracht, daz unordnung mit auf- und zuespörn sommer - und winterszeiten verhüet und morgens und nachts guete und getreüe verwahrung beschech, darumben er den thorhüetter mit ernst darzue halten soll, daz er ÿederzeit beÿ dem thor sich befinden lasse unnd auf den auß- und eingang acht habe, auch ausser notturfft daz ganz thor nicht, sondern allain daz thüerl offen halte und derselbig thorhüetter soll vleissig aufsehen, waß man ein- oder außtrage, auch die jenigen, so etwaß auß tragen, rechtferttigen, sonderlich aber nichts abgestollenes, waß daz immer sein müge, heimblich und verdeckhter zum closter hinauß tragen lasse. Es soll auch forthin daz thor jederzeit unter dem essen gespert sein, unnuz auß- und einlassen under der mallzeit vermitten bleiben. [§ 20] Er solle auch wünters zeit guete acht haben unnd nächtlicher weill alle zimer besuechen, damit die zimmer nit uberhaizt und sonderlich auf der tirniz , schneidereÿ unnd officier , da man gemainckhlich zu spillen pflegt unnd unnuz gesindt ieren underschlaiff haben und in den stuben auf den penckhen herumb ligen. [§ 21] Unnd nemblichen, wan man beÿ dem gottshaus wein schenckht, soll er bestellen, wan sich aufruhr zuetruegen, daz mit der eill zugeschlagen und gespert werde, damit er sambt deß gottshaus diennern, die ihme hierinen auf sein erfordern gehor(sam) sein sollen, desto statlicher handlen und die aufrührigen zu der straff bringen müge. [§ 22] Wann zu dem gottshaus versehens und unversehens fürnembe und sonst ehrliche gösst khumben, soll er dieselbigen empfahen, ihnen conversando (sovil dienstshalben ohne versaumbnus möglich) beÿwohnen und zimblicher ansagung, auch notturfft, wie sich aines jeden standt nach gebührt, zuge- würden und zuversehen beflissen sein. [§ 23] Er soll aber für sich selbst daz gottshaus mit besonderer und beschwärlicher gastung nicht beladen, noch ohne deß herrn praelathen vor wissen zu khu- chen unnd kheller wider gebühr schaffen, ob ihme aber sein freündt oder sonst ain guetter mann khäme, sol ers anzaigen, so wierdt mit gewierdung desselben gebüerlich gehandlet werden. [§ 24] Wan er in deß gottshaus sachen unnd handlungen uber landt geschiekht wirdt, soll er sich leidenlicher zerung mit gezimender er sparung gebrauchen und destwegen, wie auch alles seines empfangs und außgebens järlichen raittung uberraichen. 205