Seite - 434 - in INSTRUKTIONEN UND ORDNUNGEN DER STIFTSHERRSCHAFT KLOSTERNEUBURG - Quellen zur Verwaltung sowie zur Land- und Forstwirtschaft einer geistlichen Grundherrschaft in der Frühen Neuzeit

Edition [§ 2] Er soll auf die waldtkhnecht und aukhnecht sein vleissig aufsechen haben, das dieselben nichts verkhauffen oder vergeben, er soliches fur sich selbst auch nit thuen, sonder sie darzue haltten, das sÿ täglich mit vleiß die wäldt unnd auen abgehn, ob sie was nachtailigs durch frembdt leüth, die ohn zedtl unnd erlaubnus holz abschlagen woltten, erfaren, dieselben pfenndten unnd annzaigen. [§ 3] Er, forsster , soll khain au- oder waldtkhnecht , es seÿ ent- oder herdißhalb der Thonau in khainem dorff fur sich selbst oder ohne vorwissen des herrn prelaten khain aufseher oder forsster bestellen, noch aufnehmen, sonder wo derlaÿ persohnen manglen, abgehen oder zuverändern, so soll er solliches den herrn prelaten anzaigen, damit annder taugliche persohnnen aufge- nuhmen und was ihnen zuethuen gebüerth ordenlich furgehaltten werde. Dieselben sollen hinfieran auf khain zedtl von ihme forsster , sunder von ihme prelaten geferttigt, ainig holz noch erdt nicht abgeben. Wo ihnen aber zedtln von holz unnd erdt wegen zuekhumen, sollen sie dieselben dem herrn prelaten bringen unnd darauf an den forstmaister beschaidt nemen, darmit man ÿederzeit khan erfahren, das sollich zedtl nit mißgebraucht unnd unor- dennlich damit gehandelt werde. [§ 4] Ob etwo an ainem perg oder leütten holz , das verr von dem gottshauß oder nicht herzuegebracht werden möcht unnd von nötten abzugeben verhann- den oder sonnsten persohnen holz unnd erden abzugeben begeren wuerden, soll ers dem herrn prelaten zuvor anzaigen. Wen man im nach vorgehun- der besichtigung unnd nach gelegenhaidt der sachen bevelch gibt, dasselb zuverkhauffen, soll er forsster mit sambt dem waldtkhnecht jedem sein maiß unnderschiedlich außzaigen unnd solliches mit vleiß beschreiben unnd in seiner raittung furbringen, auch darüber sein aufsehen haben, damit dieselben nit weitter, als ihnen außgezaigt unnd erlaubt ist, greiffen. Wan aber vom herrn prelaten jhemandt holz zuemaißen bewilligt und desthalben ain zedtl an den forsster geben wuerde, soll er forsster sollicher bewilligung unnd zedtl gemeß das holz außzaigen unnd fur sich selbst niemandts, es seÿ zum kholl prennen oder in anderweeg, khain holz außzaigen noch zedtln auch sunsten ainiche schanckhnus, mueth unnd gab nit einnemben, beÿ verliehrung seines dienst. Was aber mit vorwissen unnd erlaubnuß des hern prelaten abgeben würdet, das gelt neben furbringung der zedtl beÿ seiner raittung fur emphanng einstellen und raitten. [§ 5] Forster soll auch innsonderhait bedacht sein, wo er holz abgibt, das solliches an den gemerckhten des gottshauß gründten bescheche, damit dem gotts- haus die poseß unnd die märch richtig erhaltten werden. 434