Seite - 686 - in INSTRUKTIONEN UND ORDNUNGEN DER STIFTSHERRSCHAFT KLOSTERNEUBURG - Quellen zur Verwaltung sowie zur Land- und Forstwirtschaft einer geistlichen Grundherrschaft in der Frühen Neuzeit

Edition [§ 10] Wan man melonen haben khan, soll man dieselben khlein zerschneiden unnd den rossen zu essen geben, purgieren gar hefftig, sonderlich durch den harn, machen feist. Diß soll man gebrauchen, biß man vermainet, gnueg zu sein, daß kan man an der operation sehen. [§ 11] Gepulverisiert seuenbaum, lorber, enzion unnd venigrecum, diese stuckh in gleichen gewicht durcheinander gemengt; nach dem purgüeren soll man den roßen aderlassen zu den zeiten, das es weder warm noch kalt, nemblich in frieling oder im herbst in einen gueten laßzeichen einmahl in jahr unndt nicht öffter, es erfordere es dan die notturfft unnd soll solche läß geschehen, ehe die roß gessen oder drunckhen, also soll man 3 stundt auf die läß auch nichts zessens geben. [§ 12] Die gesunden rosen , dieselben vor kranckheit zuhietten, soll man die hals- unndt spornadern schlagen, deß blueth auffangen unndt ein gueten anstrich darauß machen, wie der gemeine formb unndt soll mit der halß ader ab- gewexlet werden, daß man ein jahr auf der einen unnd daß ander auf der andern saiden schlagen, dann alle bede auf ein seiden zuschlagen, ist zuviel. Blued, soll man lassen einen alten roß , so über 8 oder 9 jahr khommen, nit sovil alß einen starckhen, jungen, freidigen pferdt unndt auch nach deß roß complexion, eines hat mer bluedt alß deß ander, dem feisten unnd hizigen pferden last man vil mehr alß den andern, den jungen rosen , so nicht uber 4 jahr alt, gleichsfahls dem wallachen unnd den alten soll man gar nicht lassen, es erfordert es dan die grosse nott. Die zaichen aber, so sich an einen roß erzaigen, wan eß ausserhalb der obbeschribenen zeiten deß lassens von nötten, sein dise: an den leib fahren ihne khleine pörzlein auf, geschwellen ihnen die ader, gehen sie schwermiettiger alß sie es sonsten in brauch haben, die augen werden ihnen rodt, so dan einer dise zeichen an ainem roß sicht, so soll er daß lassen nicht lang anstehen lassen, es seÿe gleich sommer oder winder oder waß es sonsten vor eine zeit seÿe in jahr, allein daß solches geschehe in abnehmeten manath unndt zu früer tags zeit, dan die nott hat weder regl noch gesez r. Man soll die jenige adern unnd sovil lassen, alß ein erfahrener schmidt vermaindt nach beschaffenheit deß pferts unnd der kranckhheit complexion von nötten zu sein etc. [§ 13] Der stal- oder satlknecht solle die roß gewöhnen, daß sie nicht scheuch sein vor bixen , federn , lunden, trumllen, gluett etc. r verbessert aus: gasez 686