Page - 443 - in INSTRUKTIONEN UND ORDNUNGEN DER STIFTSHERRSCHAFT KLOSTERNEUBURG - Quellen zur Verwaltung sowie zur Land- und Forstwirtschaft einer geistlichen Grundherrschaft in der Frühen Neuzeit

9. Die Forstwirtschaft [§ 17] Beÿ dem mair zu Tuttenndorff soll er inhalt bestallung und seines gegebnen revers darob sein, das er die agkher mit prachen, müssten und anderer notturfften zu rechter gewönlicher arbeit und gebürlicher zeit versehe, anpau und die vexung, so woll zehet traidt und habern mit treuem vleiß eingebracht und auf den agkhern zulang nit ligen gelassen werdte. [§ 18] Unnd wann daselbig eingefüerth und man zum tröschen anfächt, soll er treulich zuesehen, das es vleissig außgetroschen und nit geschleidert werde, sÿ sollen khain traidt noch habern ausser seines vorwissens abwinden, noch von dem tennen bringen, auch niemanndts andern, als lanng sÿ alda zuarbaitten haben, beÿ verlierung irer besoldung und lohn , allain dem gotshauß nacheinander arbeitten. Solche tröscher sollen mit vorwissen des hofmeisters aufgenumben und innen anfanngs furhalten, das sÿ das traidt und habern , so sie mit tröschen erdiennen möchten, dem gotshauß und nit frembten umb ein zimblichen pfening ervolgen lassen. [§ 19] Das heÿmadt soll er zu rechter zeit und weill, auch mit vorwissen des herrn prelatten anfanngen und hanndlen, darnach mit vleiß sehen, darmit das heÿ unnt graimadt zu rechter zeit gemädt unnd aufgefanngen, auch zeitlich anhaimbs gebracht und nit durchs ungewitter oder gewässer schadhafft werde. [§ 20] Er soll sich auch mit dem geschiermaister alle abennt underreden, was vonnötten, auf ÿeden tag mit fuehr zu notturfft unnd nuz des gotshauß zuhandlen und fürzunemben seÿ, damit die fuhren nit vergebentlich sunder nuzlichen und notturfftigelichen angestöldt werden. [§ 21] Beÿ den wagenkhnechten soll er neben dem gschiermaister darob sein, das sÿ den im gschierhoff haltunden rossen vleissig wartten, den habern , so man innen darauf gibt, nit verkhauffen, sunder den rossen wolgeseubert zue ÿeder rechter zeit fürgeben, dann ob ain roß durch unvleiß verdürbe, soll solches ime forster an seiner besoldung abgezogen werden. So soll er auch sein vleissiges aufsehen haben, damit die reit- und wagenkhnecht mit dem heÿ und streÿ recht umbgehn, nit überfluß sonnder die notturfft nemmen und nit under die füeß tretten oder in anderweeg bößlich verschwenndten. [§ 22] Damit des morgens ain ÿeder zeitlich, wohin er verordnet, ausfhar, soll geschiermaister mit sonnderm vleiß verschaffen und in abwesen des forsters aufsehen. Wan sÿ in das closter holz führen, soll achtung geben werden, das sÿ nit anhänng haben, auch zu abennts vor gebürlicher zeit nit aus- pannen, auch beÿ straff nit gestatten, das sÿ unnuz leichtferttiges gesündt oder dergleichen zue sich in den gschierhoff führen oder aufhalten, alle 443